.

Lipo li ti je imat dvi putovnice. Onu nasu hrvatsku sto te pritendi po rodjenju i ovu novu naturaliziranu australsku. Mislim naturaliziranu jerbo u njoj stoji da sam Australac, a znas da nisam, kad se gleda po krvi. Ma opet san je prihvati ki svoju, draga mi je i ucuni san ti skerac jerbo je kurabila po svitu. I kako onda neces snjon putovat, kazat je onako iz visoka kad za nju ni potriba od vize i ni ti potriba hodit na nikakve informativne razgovore. Nego di promislis tu se i zaputis. A i Australija je jedna isto lipa i komodna zemlja. Srerdjeni parkovi a u njima isto tako i sredjeni javni nuznici , siroke ceste, auto puti, sve u funkciji javnoga dobra. Necu sad govorit o pokretnoj i nepokretnoj imovini pojedinca jer ju je svak stvori po vlastitom trudu, znanju i sposobnosti, a to ni tema za raspravu. Dobota ti ni potriba od australske putovnice jer se ne bis ninjdi mica odavde. Za nju se je doduse trebalo malo i potrudid. Tukalo je stat zaredom dva godisca ode i prihvatit odredjene obaveze da bis moga peskat ovi lipi karag od dokumenta.

Soma, vaja isto digo poc zavirit sto je doma. Vidit mater i oca, famiju, skolske, rec prijatejima di si dospi i na sto si avanca. Ukazat koju sliku iz one prosperitetne Australije, a snimit stare kraje s kamerom da ne bi izventilo stogod iz glave. Naravno po domacoj potrebi ukazes onu svoju krvnu putovnicu jer si onda u kategoriji domacega gosta, svoga covika. I opet se osjecas onako lipo ki svoj na svome, a ne utira te potrosit. A kad sve to svrsi i dodje vrime se vratit onamo di si u zivotu doventa opet vadimo onu drugu dokumentu, jer nikad se ne zna.

Ma neka ti je ode lipo i komodno opet ti vrag ne da mira pa te inrigaje i krujozan si za sve ono sto se dogadja Doma. Zanima te koliko je igra Zmaj s Lukom (nema veze sto nisu u istoj ligi) kako prohodu pokladi, i naravno one incognito teme sto nisu za ove stranice. Tako u zadnje vrime svi govoru o tom nesricnom porezu na kuce (citaj vikendice). Te ovako , te onako. Te jesmo , te nismo. Spominju se neki razredi , vadu se drugi korjeni, jos samo da se ne pocmemo ticat u tanges I kontages. Svih nas nisto utira , svi opet vadimo domacu dokumentu. Tako da je i mene ta posast oblizla.

Prin dvi-tri veceri san isa lec, ma ne mogu spat. Vrtin se, kontuban se po posteji, sto livo, sto desno, kontan. Capala se je bila dobota ura. Ona je vec odavna pocela rezat da sto mije, koji mi je jarac …oli ti je stogod naskodilo kad se stalno okreces? pitala me je jadna jerbo Ona ne razumi. A i nima sto razumit kad je rodjena ode i kad je njon puno stvari jednostavnije. Nikako san u niku uru zaspa i onda san usnu san.

Sanja san da je poce rat, Boze mi oprosti. Pravi pravcati rat (jer on nama ni furest ). Da su Australiju napali sve teroristicke grupe ovega svita na celu sa samin Bin-Ladenom. I ne samo on nego Juzna i Sjeverna Koreja zajedno, Irak, Indonezija, svi… svi su nas judi moji tu noc napali. Sto ces, pocela je mobilizacija i kupu svih po redu, jerbo se vaja slozno nacionalno jedinstveni oduprit toj invaziji. Oko nikog doba eto ti dvojice i na moja vrata. Tucu, skrabju, deru se, vajalo je otvorit. Naredba je da svi gredu u obranu. Ja jih gledan onako iza sna, jidan sto su me probudilii pitan ih da dicu poc. U stvari odma san reka da jan ne gren ninjdi. Di cu ja poc kad san jan Hrvat , Blacani, fetivi iz Malega ucijaka i po materi i po ocu. Sve znan o Blatu- vicen jan u strahu- znan kad su se usadile lipe na Zlinjama, kad se je pocela gradit skula, ko je bi najduze potestat u mistu, sve znan. Di cu ja judi moji poc sad branit Australiju! A ova me dvojica gledaju, nista in ni jasno, namrgodili su one svoje pigave, nastrapane face ( tako su izgledali grubi, virujte mi) i poceli vikad da neka ne pi….. puno nego da se izjubin sa zenom i dicon i da se skupin. Vidin jan da je vrag odni salu, i neka san Wog ( pogrdni naziv za evropske doseljenike) da cu isto morat put Papa Nove Gvineje. 

Ma ne dan se jan tako lako. Zaigracu jan na drugu kartu, dok su zena i dica odavno vec bili u placu. Poce san vikat da necu jan poginut za Krajicu, da san ja republikanac…Zivila republika!- zareva san dva puta sto san moga jace. I jos san vika da ne volin John Hawarda jer da lici na Koalu i da stavje nos Bushu pa da ga poradi toga zovu Bonzaj, da cu glasat za Laburiste. Svasta san vika a ona su se dvojica samo tupo pogledala i poceli se smijat. Samo su mi rekli prin nego sto su me capali za vrat a Ona bila u velikanem placu , da….Mozes ti vikat i lajat koliko god hoces ovo je demokratska zemja, ali ode se postuje ono sto se odluci i nema ti majke gres snama, pa ako se vratis! 

Na to san ja skroz poludi i poce se pravit lud koliko san moga i nemoga , tako da su se oni sirote skroz pripali a Ona je znala da se zaj…. jerbo me zna odoprin. Pa su oni jadni promislili boje se je liberat ovega jer ce ubit sebe i druge oko sebe i tako ce ucinit vise scete nego koristi, pa ga je najboje ostavit na miru. Boje nego placat za Zenu i dicu ratni pesjun. Tako su i ucinili, a jan san se skapula. I u to sto su isli ca jan se probudin. Ona je spala jer je bilo tek prid zoru. Bi san cili oznojan, smatan, crjen ma mi je bilo puno lasnje. Cuti san se skroz odahnuto.I na koncu mi je pa kamen sa srca.

Shvati san da se porez mora placat. Da se u demokraciji moze govorit sto te je voja ali da se moraju postivat institucije sistema i pravna drzava, pa makar te stogod i ne pijazalo. I da ni svako zlo za zlo, jer uvik prvo treba gledat ono sto je dobro.
Pa san zato viknu Zivila Republika…Zivilo Blato!- a Ona se je na to probudila i onako kroz zube u soku pitala…koji ti je jarac…..covice!?

Zdravi i veseli bili pozdravlja vas vas Mate!
Ova e-mail adresa je zaštićena od spambota. Potrebno je omogućiti JavaScript da je vidite.